Keriç köprüniñ tamiri içün kerekli olğan qoşma köpürniñ quruluvı eki ay devam etecek, dep bildirdi Rusiye baş nazir muavini Marat Husnullin.
İlk malümatqa köre, Keriç köprüniñ tamiri 1-1,3 milliard dollar olacaq.
"Daa tünevin Tolyattiden boru ve metal yapılarınıñ köçürilmesine başladıq. Biz onı eki ay içinde quracaqmız. Fiyatı şimdilik 1,3 milliard ruble dep saydıq", - dep bildirdi o.
İyülniñ 17-nde saba Qırımnıñ Rusiye yolbaşçısı Sergey Aksenov Keriç (Qırım) köpründe areket toqtatıldı, dep bildirdi. Onıñ aytqanına köre, Rusiyeniñ Krasnodar ülkesi tarafından 145-inci dayaq fevqulâde adise oldı.
Rusiye Naqliyat nazirligi köpür yolu zarar kördi, dep bildirdi. Telegram kanalları patlavlar aqqında yazıp, zarar körgen arabanıñ fotoresimlerini paylaşa. Rusiye tarafdarı bloger Aleksandr Talipov eki patlav aqqında yazdı – 3:04-te ve 3:20-de.
Belgorod vilâyetiniñ valisi Vâçeslav Gladkov bir qoranta çifti elâk oldı, dep bildirdi. Arabada 14 yaşında qızları da bar edi.
Ukrayina Mudafaa nazirliginiñ Baş istihbarat idaresiniñ spikeri Andriy Yusov Keriç köpründeki «fevqulâde adiseni» izaatlamağa istemedi. «Tek Ukrayına Mudafaa nazirligi Baş istihbarat idaresiniñ reberi Kırılo Budanovnıñ «Qırım köprü – artqaç bir inşaat» degen laflarını tekrarlamaq mümkün», – dep ayttı o, «Suspilne» izaatlarında.
RBK-Ukrayina menbalarına esaslanıp, Qırım köpründe olğan zararlar – Ukrayına Silâlı quvetleri ve Telükesizlik hızmetiniñ Arbiy-deñiz quvetleriniñ mahsus operatsiyasıdır, dep bildire.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
