Keriç köprüniñ demiryol qısmından yük areketi 2020 senesi iyün 1-inde açılacaq. Bunı Rusiye naqliyat naziriniñ müavini Vladimir Tokarev haber etti, dep bildire TASS Rusiye haber agentligi.
"İyünnin 1-inde planlaştıramız", - dedi o. Tokarevnıñ aytqanına köre, demiryoldan, birinciden, yaqıt, qurulış mahsulatı ve qum taşıycaqlar.
Daa evel haber etile edi ki, Rusiye nezaretindeki Qırım başı Sergey Aksönov, kelecek kurort mevsimine qadar Keriç köpründen Rusiyeden Kefe ve Kezlevge poyezd yürüşlerini başlamağa istey.
Keriç köprüden keçecek yük trenleriniñ areketini 2020 senesi iyün ayında başlatmağa planlaştıralar.
«Grand Servis Ekspress» naqliyat şirketi noyabrniñ 8-nde saba Keriç köprüden ketecek Qırımnıñ yolcu trenlerine bilet satmağa başladı.
Sentâbrniñ 24-nde Rusiye kütleviy haber vastaları dizelli lokomotiv test şeklinde Keriç köprüniñ demiryol qısmını keçti, dep bildirdi. «Stroygazmontaj» şirketiniñ müdiri, Rusiye iş adamı Arkadiy Rotenbergniñ bildirgenine köre, köpürniñ demiryol qısmında areket 2019 senesi dekabr ayında başlatılacaq.
Daa evel Rusiye akimiyeti Keriç köprüne 166 «yañı vagonnı» bermege vade etken edi. «Qırım demiryolları» müdiri Aleksey Gladilin Keriç köprüniñ demiryol qısmı açılğan soñ andan qomşu Rusiyeniñ 11 şeerinden trenler keçecek, dep ilân etti.
2019 senesi mayıs ayında Rusiye prezidenti Vladimir Putin Keriç köprüniñ demiryolu «cedvelden daa tez qurarlar», dep bildirdi.
