Rusiye naqliyat nazirligi Keriç köprüdeki areketni bir aftağa toqtatmağa azırlana.
Müessiseniñ malümatına köre, dekabrniñ 18-i saat 00:00-dan ve dekabrniñ 25-i saat 23:59-ğa qadar tehnologik işlerniñ keçirilüvi planlaştırıla.
Daa evel Keriç köprüden keçecek Qırım yolcu tren biletleriniñ satışı başlandı, dep haber etildi. Sankt-Peterburgdan Aqyarğa yol alacaq ilk tren dekabrniñ 23-nde çıqacaq.
Keriç boğazındaki köpürniñ maşina qısmı 2018 senesi mayıs ayında yengil maşinalar içün açılğan edi, daa soñra yük maşinalarınıñ areketi başlatıldı. Köpürniñ demiryol qısmı daa azır degil.
Ukrainanıñ beşinci prezidenti Petro Poroşenko Rusiye işğal etken Qırımda Keriç köprüniñ qanunsız qurucılığı Kremlniñ halqara uquqqa emiyet bermegeniniñ daa bir delili ola, dep bildirgen edi.
Avropa Birligi ve ABD Rusiye ve işğal altındaki Qırım arasındaki Keriç köprüniñ qısmen açılışını takbih etti. Ukraina tarafı 2014 senesi Qırım ilhaq etilgen soñ Rusiye ile köpür qurucılığı añlaşmasından çıqtı.
2014 senesi iyül ayında Ukraina ükümeti ilhaq etilgen Qırımdaki bütün limanlarnıñ işini resmiy şekilde toqtatqan edi.
