İlk küz ayınıñ 30-nda gece Rusiye akimiyeti Keriç köpründe yarım saatqa areketni toqtatqan, bazı Qırım telegram kanallarında Kefede RF Ava mudafaasınıñ çalışqanı ve 2-3 patlav eşitilgeni aqqında bildirdiler.
Köpürde areketniñ toqtatıluvı aqqında yerli vaqıtnen saat 2:57-de Rusiye akimiyetiniñ nezaretindeki köpürdeki vaziyetni nezaret etken kanal bildirdi. Saat 3:28, kanalnıñ malümatına köre, naqliyat areketi ğayrıdan açılğan. Köpürniñ qapatılmasınıñ sebebi aqqında resmiy şekilde haber etilmedi.
"Krımskiy veter" teleqram kanalı ilk küz ayınıñ 30-nda saba bildirdi ki, Kefede saat 2:57 ve 3:00 arasında RF Ava mudafaasınıñ işi ve 2-3 patlav eşitildi. Rusiye nezaret kanallarında raketa ve uçucısız uçaq telükesi aqqında tenbilegenler. Rusiye akimiyeti vaziyetni şimdilik izaatlamay.
Rusiye Mudafaa nazirliginde Qırımdaki ücüm aqqında haber etilmedi. Müessisede, qomşu Rusiyeniñ üzerinde urulıp tüşürilgen 81 uçucısız uçaq, hususan Rostov vilâyetiniñ üzerinde yoq etilgen 12 dron aqqında esabat berildi. Ukrayina tarafı bu haberlerni izaatlamadı.
2022 senesinden başlap Qırım aman-aman er kün pilotsız uçaq ve raketalarnıñ ücümlerine oğray. Rusiye akimiyeti, faktlar tasdıqlansa bile, arbiy obyektlerge zarar ketirilgenini inkâr ete.