Rusiye kontrolindeki Qırım yolbaşçısınıñ mesleatçısı Oleg Krüçkov martnıñ 1-nde aqşam Qırımnıñ Cenübiy yalısındaki bir çoq yerde eşitilgen küçlü sesni izaatladı.
«Er kes bam-başqa bir kerçeknen yaşağanımıznı añlamalı, uçaqlar küçlü seske keçe, ava mudafaası ve radioelektron küreş çalışa. Duşman qırımlılarnı farqlı usullarnen qorquzmağa tırışa, yapamaz», – dep yazdı Krüçkov Telegram kanalında.
Krüçkov bu sesniñ sebebi ne oldı aytmadı.
Berilgen malümatqa köre, martnıñ 1-nde aqşam Bağçasaray, Yalta ve Gurzufta patlavğa beñzegen küçlü ses eştitilgen. Rusiye tarafdarı bloger Aleksandr Talipov bu ses eşitilgen videonı yayınladı. Onıñ versiyasına köre, Rusiye uçağınıñ ses üstü tezlikke keçmesi edi.
Rusiye akimiyeti ve arbiyleri vaziyetni şimdilik izaatlamaylar. Diger menbalardan bu malümatnı teşkermek imkânsızdır.
Avgusttan başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
