Rusiyedeki Saratov ve Engels bu gece büyük uçucısız ücümine oğradılar, sanayı müessiselerinden birinde zarar oldı, dep yazdı yanvarniñ 8-nde saba Saratov vilâyetiniñ valisi Roman Busargin.
İlk malümatqa köre, kimse zarar körmedi. Ücümge oğrağan zavodda yanğın çıqtı, dep haber ete Rusiye akimiyeti.
Rusiye Telegram kanalları qayd eteler ki, Engelste cermay anbarınıñ etrafında tüşürilgen uçucısız parçalardan yanğın çıqtı.
Rusiye Mudafaa nazirligi Rusiyeniñ yedi regionında 32 dron tüşürildi, dep haber etti. Hususan, Saratov vilâyetinde 11, Kursk ve Rostov vilâyetlerinde – dörter uçucısız. Belgorod ve Brânsk vilâyetlerinde üçer, Krasnodar ülkesinde eki, Volgograd vilâyetinde bir ve Azaq deñizinde dört.
Bu malümatnı alternativ menbalardan faydalanıp teşkermek şimdilik imkânsız ola.
Rusiyeniñ Ukrayinağa qarşı bir sıra büyük ücüminden soñ Ukrayina prezidenti Volodımır Zelenskıy Ukrayina Rusiye topraqlarında arbiy nişanlarğa ücüm etmege devam etecegini bildirdi. Bundan evel Ukrayina tarafı Rusiyedeki cermay zavodlarına qarşı böyle ücümlerni tasdıqlap, böyle obyektler Rusiye Federatsiyasınıñ işğalci ordusını teminlemek içün faal qullanılğanını qayd etken edi.
2024 senesiniñ başından Rusiyeniñ cermay rafinirleyici zavodlarına ukrayin dronları daima ücüm ete. Bazı zavodlarda birinci cermay işletüv donatmaları çalışmay edi. Lâkin aprel ayında Rusiye esas cermay zavodlarınıñ quvetini qısmen tikley bildi.
Avgust ayında çıqqan BBC tahminlerine köre, yıl başından Ukrayina Silâlı quvetleri Rusiyedeki cermay zavodlarına ve cermay infrastrukturasına eñ az 64 kere ücüm etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
