Qırımda Rusiye akimiyeti Ukrayınağa qarşı cenkte iştirak etken Rusiye arbiylerine topraq berilüvine dair 600 buyruq azırladı. Bu aqta Qırımtatar Milliy Meclisiniñ reisi Refat Çubarov ayttı.
«Qırımda cenk cinayetçileriniñ cedvelleri tizile. Başta olaraq topraq damartıları berilecek. Rusiye varvarları işğal etken Qırımda «mahsus arbiy operatsiyanıñ iştirakçilerine», aslında – cenk cinayetçilerine bedava topraq damartılarınıñ berilüvine dair tahminen 600 qarar çıqarıldı. Bu maqsadnen Qırımnıñ Saq ve Aqmeçit rayonlarında ayrı yerler şekillendirile», – dep yazdı Çubarov Facebookta.
Ukrayına prezidentiniñ Qırım Muhtar Cumhuriyetindeki temsilciligi bildirgenine köre, Ukrayınağa qarşı cenkte iştirak etken sekiz Rusiye arbiyi Yaltada topraq vesiqalarını aldı.
Temsilcilik qayd etkenine köre, topraq aprel ayında berilip başladı – 55 Yalta sakini sertifikat aldı, daa 200 ariza baqıla.
Er bir topraq damartısı 6 yüz metr kâredir, episi Saq rayonında yerleşe, dep aytıla.
2022 senesi dekabr ayında Qırımnıñ Rusiye parlamenti Ukrayınağa qarşı cenkte iştirak etken qırımlılarğa bedava topraq damartılarını bermege izin berdi. Aprelniñ 7-nde belli olğanına köre, Rusiye kontrolindeki Qırım akimiyeti Ukrayınağa qarşı cenk iştirakçilerine topraq damartılarını berüv fermanlarını berip başladı. TASS Rusiye agentliginiñ malümatına köre, başta umumen 56 gektarlıq 511 damartı azırlandı. Episi Saq rayonında yerleşe.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
