Rejim başqa bir emir berilgenine qadar devam etecek. Bu sebepten Razvojayev, Rusiye tarafından yaratılğan "Fevqulâde vaziyetni" yoq etmek içün Aqyarnıñ yerli akimiyet organlarına mütenasip emir berdi.
Bundan ğayrı, Razvojayevniñ bildirgenine köre, şimdi Moskovağa 15-20 zarar körgen adamnıñ ketirilmesi meselesi çezilmekte. Şeerniñ rusiyeli yolbaşçısınıñ malümatına köre, patlavlar neticesinde dört insan elâk oldı, 153 insan tibbiy yardım içün muracaat etti, 82 kişi hastahanege alındı. Rusiye kontrolindeki Aqyar akimiyeti zarar körgenlerniñ episi para alacaq, dep bildirdi.
İyünniñ 23-nde saba yerli ve rusiyeli telegram kanalları Aqyar, Kezlev ve Saq rayonlarında patlavlarğa oşağan yüksek sesler ve ava mudafaasınıñ işi aqqında bildirdiler. ASTRA telegram kanalınıñ Aqyar sakinlerine atfı etip yazğanına köre, ücüm vaqtında şeerde ava telükesi aqqında signal yoq edi, plâjlarda ise balaları ile çoq qoranta bar edi. Daa soñra Razvojayev Uçkuyevkada ve Lübimovkada elâk olğan ve yaralanğanlar aqqında bildirdi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
