Rusiye 76 Ukraina vatandaşını «siyasiy sebeplerden» tuta, dep bildirdi Ukraina Tış işler nazirligi Azatlıq Radiosınıñ muracaatına cevap berip.
Müessise malümatına köre, Rusiyede mahküm etilgen ve tutulğan ukrainalılarnıñ sayısı 6800 ola.
Yaznıñ başında Ukraina tahqiqat izolâtorları ve apishanelerinde 300-den çoq rusiyeli tutulğan edi.
Ukraina Tış işler nazirligi Azatlıq Radiosına cevap berip, oktâbrniñ 1-nde çetelde 11968 Ukraina vatandaşı tutuldı, dep haber etti. Daa 6202 ukrainalı çeşit cinayetler yapqanı içün mahküm etildi.
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.
