Qırımnıñ rusiyeli akimiyeti qırımtatarlarnıñ taqibatını devam ete. Hususan, 2015 senesinden berli eñ azından 63 qırımtatar sahte qabaatlav ile apis etildi. Bu Human Rights Watch halqara uquq qoruyıcı teşkilâtınıñ maruzasında bildirile.
"Tek mart ayında Rusiye akimiyeti 24 adamnı tevqif etti, olarnıñ çoqusı "Qırım birdemligi"niñ azaları edi. Er kesni Rusiyede yasaq etilgen, amma Ukrainada serbest faaliyet köstergen "Hizb ut-Tahrir" teşkilâtı ile alâqada qabaatlaylar", - qayd etti uquq qoruyıcılar.
Beyanatta, tutulğanlarnıñ iç birisi yapılğan zorbalıq eyleminde qabaatlanmadı, dep qoşula.
"Rusiye akimiyeti eñ azından dört adamnı işkencege oğrattı. İyünde akimiyet Qırımda aynı qabaatlav ile daa sekiz adamnı tevqif etti", - denile vesiqada.
Bıltır iyül ayında Qırımdaki rusiye akimiyeti, qırımtatarlar yarımadanıñ ilhaqını qabul etmegeni içün, olarnı ekstremist ve terrorist olaraq köstermege tırışa. Terrorcılıqta qabaatlav ise qolay basqı aleti oldı. Bu aqta halqara uquq qoruyıcı Human Rights Watch teşkilâtınıñ Avropa ve Merkeziy Asiya boyunca müdiri Hugh Williamson bildirdi.
