İşğal etilgen Qırımda endi 10 yıldan ziyade iç bir vatandaş özüni telükesizlikte duyamay, dep bildirdi Qırımtatar Milliy Meclisi reisiniñ muavini Nariman Celâl "Crimea Global. Ukrayinanı cenüpten añlamaq" ekinci halqara konferentsiyasında.
"Bugün Qırımda iç bir vatandaş özüni telükesizlikte duyamay ve ihtiyac olsa, aqlarını ve ayatını qorçalay bilecegine emin olamaz. Qırımlılarğa qarşı terror 10 yıllıq cenkten soñ da devam ete", — dep qayd etti o.
Onıñ aytqanına köre, Qırım sakinleri qorqu ve şübhe müitinde yaşamağa mecburlar, bir-birine işanç buhranı bar, Rusiye akimiyetiniñ basqısı altında öz iradesine qarşı areket etmege mecburlar. Meselâ, qanunsız saylavlarda iştirak etmek, cenkni desteklemek ya da siyasiy teşviqat aktsiyalarına çıqmaq.
Bugünki künde Qırımda serbest jurnalistika yoq etildi, dep devam etti Celâl. Vatandaş jurnalistleri ve faalleri, şu cümleden mediacılarnıñ yerini alğan qırımtatarlar, repressiyalarğa oğratıla. 18 qırımlı jurnalist apiste buluna. Bugünki künde 218 qırımlı siyasiy mabüs aqqında belli, olarnıñ arasında 132 qırımtatar bar.
Meclis reisiniñ muavini, siyasiy mabüsler keçirgen sınavlarnı özü de is etkenini qayd etti. Bular — yaramay aş, tibbiy yardımnıñ yetmemezligi, maneviy ve fizikiy alçaqlav ve taqip, ve adaletsizlik duyğusı.
Bunıñ ile Celâl qayd etti ki, er şeyge baqmadan, Qırımda ukrayin vatandaşları öz memleketine sevgilerini, demokratik qıymetlerge bağlılıqlarını saqlap qalalar ve insan aqları ve serbestliklerini serbest qullanmaq isteyler.
"Biñlernen semetdeşim Qırım yarımadasınıñ işğalden azat etilmesini bekley. Bu duyğularnı tıştan körmek qıyın, bugün Aqmescit, Bağçasaray ya da Yaltada olğanda bile. Çünki işğalci akimiyet sakinlerniñ er angi sadıqlıq numayışlarına sert cevap bere", — dep qoştı o.
Bundan evel ZMINA insan aqları merkezi, Rusiye tarafından mahküm etilgen 60-tan ziyade qırımlınıñ acele tibbiy yardımğa muhtac olğanını bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
