Rusiye şeerlerinde Donbastaki cennke ve Qırım ilhaqına qarşı yazılar peyda oldı. Rusiyeniñ Leningrad vilâyetiniñ Tosno şeeriniñ kirişinde kimligi belli olmağan insanlar «Qırımnı Ukrainağa qaytarayıq», Pskov şeeriniñ abide taşında ise «Qırım bizim degil» dep yazdı, dep bildire Azatlıq Radiosı.
Sankt-Peterburgda 1-inci Rabfakovskiy aralığı, 5-inci korpus adresi boyunca mesken evde kimligi belli olmağanlar «Donbas içün ölmege yeter» dep yazdı.
Bu fotoresimlerni Azatlıq Radiosınıñ «Donbas.Realii» tele leyhasınıñ jurnalistlerine yerli sakinler yolladı.
Daa evel bunıñ kibi aktsiyalar Ukraina kontrol etmegen Donbas topraqlarında keçirile edi. Donetsk ve Luganskta Ukraina Mustaqillik Künü munasebetinen ukrain timsalleri qayd etilgen edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
