Rusiye baş naziri Dmitriy Medvedev Rusiye prezidentiniñ ilân etken Rusiye anayasasınıñ deñişmeleri sebebinden istifağa çıqa. Bu aqta Medvedev prezident Vladimir Putinniñ nazirler şurasınen keçirgen körüşüv vaqtında bildirdi.
«Bu deñişmeler qabul etilgende, bu, büyük ihtimalnen, muzakereden soñ olacaq, tek bir sıra anayasa maddelerinde ciddiy deñişmeler olmaycaq, akimiyetniñ balansı umumen deñişecek, icra, qanun çıqarıcı, mahkeme akimiyeti deñişecek», – dep ayttı baş nazir.
Medvedevniñ bildirgenine köre, «bu köntekstte añlaşıla ki, bizler, Rusiye ükümeti olaraq, memleketimizniñ prezidentine bu şaraitlerde bütün kerekli qararlarnı almasına imkân bermelimiz, Rusiye Anayasasınıñ 117-nci maddesine köre Rusiye ükümetiniñ şimdiki erkânı istifağa ariza berse, doğru olur, dep tüşünem».
Putin, Medvedevge yapqan işi içün teşekkürler bildirdi.
«Er şey yapmağa imkân olmadı, amma er şey er vaqıt bütünley yapılmay», – dep qoştı Putin.
Rusiye prezidenti Telükesizlik şurası reisiniñ muavini yañı vazifesini kirsetmek ve bu vazifege Medvedevni tayinlemek niyeti aqqında bildirdi.
Putin, ükümet azalarından yañı nazirler şurası şekillendirilgenine qadar vazifelerini yapmasını rica etti.
Medvedev 2012 senesi mayısnıñ 8-nden berli Rusiye baş naziri edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
