Rusiye fleyta çalğıcısı ilhaq etilgen Qırımnı qanunsız ziyaret etkeni içün Ukrainağa üç yılğa kirişi yasaqlandı. Bunı martnıñ 5-inde Ukraina Devlet Sıñır Hızmeti haber etti.
Müessise malümatına köre, çalğıcı Kyivge Bratislavadan keldi.
"Qoşma teşkerüv yapılğanda, sıñırcılar, Rusiye vatandaşı Ukrainağa klassik muzıka festivalinde iştirak etmek içün kelgenini bildiler. Fleytacığa devlet sıñrını keçmek Qırımnıñ qanunsız ziyareti keder etti. Sıñırcılar, bu adam ilhaq etilgen yarımadanı ziyaret etkenini bildi", - denile beyanatta.
Sıñırcılar çalğıcınıñ adını aydınlatmadı.
Daa evel Ukraina devlet sıñır hızmeti, evelce Qırımnı qanunsız ziyaret etken jurnalistika ve içtimaiy bağlar saalarındaki eki rusiye mütehassısına Ukrainağa üç yıllıq kiriş yasağını berdi.
2014 senesinden başlap, Rusiyeniñ silâlı istilâsı başlağanınen, Ukrainağa 5024 rusiyeli kirsetilmedi.
İç işler nazirliginiñ malümatına köre, keçken sene devamında sıñırcılar 7300 Rusiye vatandaşını Ukrainağa kirsetmedi, olarnıñ Ukrainağa kirişi yasaqlanğan ya da Ukrainada bulunuv müddeti bitken, ya da işğal altındaki topraqlarnı qanunsız ziyaret etkenlerine dair malümat bar edi.
Ukraina medeniyet nazirligi, milliy telükesizlik içün telüke bar olğanından Ukraina sıñırından keçmesi yasaqlanğan Rusiye artistleriniñ cedvelini tize.
