59 yaşındaki "Aluşta" din cemiyetiniñ sabıq azası Ruslan Mesutov yarım yıldan berli ceza izolâtorından çıqarılmay. Bu aqta "Qırım birdemligi" qırımtatrnıñ qız qardaşı Lilâ Mesutovağa atıf etip bildire.
"O, ŞİZOdan asla çıqmay. Apishanege kirgeninden berli yarım yıldan berli çıqmay", — dedi o.
Mektübinde Mesutov sağlıq alı ve yürek ağrısından şikâyet ete. Ayaqları ağıra, damarları çatlay, amma apishane ekimleri yardım etmey.
"Eñ qıyını bütün bularnı ayaqta keçirmege mecbur. Çünki saba saat 5-te yataqlarnı divarğa bağlaylar, ve aqşam 9-ğa qadar olarnı tüşürmeyler", — dep yazdı qırımlı mektübinde.
Üç ay evelsi, saban ayınıñ ortasında, Mesutovnı, essiz soñ, hastahanege alıp ketkenler. O vaqıt onıñ yüreginde şiddetli ağrılar başlandı. Lâkin bir afta soñra, üç aftalıq tedaviylev yerine, onı koloniyağa qaytardılar ve bir kameralı odağa yerleştirdiler (eñ sert izolâtsiya).
2019 senesi ilk yaz ayınıñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye akimiyeti Nagayev ve Umerovnı Rusiyede terroristik tanılğan, amma bir çoq memlekette milliy qanunlar seviyesinde sıñırsız faaliyet köstergen «Hizb ut-Tahrir» islâm siyasiy firqasınen alâqaları bar dep qabaatladı.
2021 senesi avgustnıñ 16-nda Cenübiy okrugınıñ arbiy mahkemesi «Aluştadaki Hizb ut-Tahrir gruppasınıñ» mabüsleri Ruslan Nagayev, Eldar Kantimirov, Ruslan Mesutov ve Lenur Halilovnıñ ükmüni çıqardı. Erkekler terror faaliyetinde qabaatlanıp, 13, 12 ve 18 yıl sert rejimli koloniyada qalmasına üküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
