Rusiye mahkemesi tarafından mahküm etilgen ve Rusiye Federatsiyasında apishanede tutulğan Qırımlı İvan Yatskinge Kemerovo şeeriniñ 5-nci tüzetüv koloniyasınıñ memuriyeti tarafından basqı arta. Bu aqta Kremlniñ sabıq mabüsi ve Qırım.Aqiqat jurnalisti Vladislav Yesipenko Facebook saifesinde bildirdi.
"Kemerovo şeeriniñ (Rusiye Federatsiyası) 5-nci tüzetüv koloniyasınıñ memuriyeti Ukrayin siyasiy mabüsi Qırımlı İvan Yatskinge qarşı basqını quvetleştire. Sağlıq alı ağır olğanına baqmadan - mahkümniñ ayaqlarında progressiv trofik ülserler olğanına baqmadan, onı telükeli mabüsler içün mahsus bölükke avuştırdılar. Hasta olğanına baqmadan, onı saatlernen lokal zonasında turmağa ve içki tertip qaidelerini (PVR) oqumağa mecbur eteler. Bölükniñ aktivleri tarafından daimiy maneviy basqı yapıla. Esirliginiñ yedinci yılı keçe", — dep yazdı Yesipenko.
2021 senesi mayısnıñ 21-nde Rusiye nezaretinde olğan Qırımnıñ Yuqarı mahkemesi "devlet hainliginen" qabaatlanğan Qırım sakini İvan Yatskinge üküm çıqardı. Alla Hineviçniñ reisliginde qadılar kollegiyası İvan Yatskinni bir yıl sıñırlav ile 11 yıl sert apis cezasına mahküm etti.
Qırımnıñ Curçı rayonınıñ Aybar (Voykovo) köyüniñ sakini İvan Yatskin 2019 yılda oktâbr 16-sında tutuldı. Bu dekabr ayında belli oldı. Rusiye tahqiqatı, Yatskin Qırımda olıp, UMT ile işbirlik yaptı ve "Rusiyeniñ devlet sırı" olğan malümatnı olarğa bildirdi, dep iddia ete. Qırım.Aqiqatnıñ Ukrayina telükesizlik hızmetine yollağan muracaat cevabında İvan Yatskin UTH ile işbirlik yapmadı, dep aytıla.
"Memorial" aq qorçalayıcı merkezi İvan Yatskinni siyasiy mabüs dep tanıdı.