ABD devlet kâtibi Marco Rubio ve Rusiye zenaatdaşı Sergey Lavrovnıñ beklenilgen körüşüvi başqa vaqıtqa qaldırıldı ve bu afta olmaycaq, dep haber ete CNN Beyaz saray vekiliniñ malümatına esaslanıp.
Menbalardan biri haber etkenine köre, Rubio ve Lavrovnıñ Rusiyeniñ Ukrayinağa qarşı cenkini toqtatuvınen bağlı çeşit beklevleri bar.
Rubio ve Lavrov bazarertesi künü telefonda laf etip, nevbetteki adımlarnı muzakere etti.
Rusiye Tış işler nazirligi bildirgenine köre, “konstruktiv bir munaqaşa” oldı. Amma ABD Devlet kâtibiyeti “konstruktiv” sözüni qullanmadı.
“Nazir Rusiye-Ukrayina cenkiniñ uzun müddetli toqtatıluvında, prezident Trumpnıñ fikirince, olacaq körüşüvlerniñ müimligini qayd etti”, – dep ayttı Tommy Pigott, ABD Devlet departamentiniñ reis muavini.
Reuters agentligi haber etkenine köre, Lavrov ve Rubionıñ körüşüvi oktâbrniñ 23-nde ola bile.
Beyaz saray ve Kreml körüşüvniñ başqa vaqıtqa alınğanınen bağlı muracaatlarğa cevap bermedi.
Rubio ve Lavrovnıñ körüşüvi bu yıl ABD prezidenti Donald Trump ve Rusiye prezidenti Vladimir Putin arasında ekinci sammitke esas azırlıq adımı olaraq sayılğan edi.
CNN telekanalı haber etkenine köre, Rubio-Lavrov körüşüviniñ başqa vaqıtqa qaldırılğanı Budapeştte planlaştırılğan Trump-Putin sammitine nasıl tesir etecek añlaşılmay.
