Qırımdaki Roszdravnadzor idaresi aphanelerde paratsetamol qıtlığını qayd ete. Bu aqta müessise yolbaşçısı Vasiliy Klimov martnıñ 30-nda koronavirus yuqunçınıñ tarqaluvına qarşı operativ ştab toplaşuvında bildirdi.
«Paratsetamol – eñ adiy ve ucuz ilâclardan biri, amma içtimaiy ağlardan berilgen malümat onıñ semereli bir ilâc olğanını bildire. Qalğan bütün steroidal olmağan ilâclar telükeli bile ola, olarnı aphanelerden çıqardılar. Substantsiya yapmaq içün madde problemi yoq. Şunıñ içün eñ yaqın vaqıtta paratsetamol teslimatı başqa künge avuştırıldı», – dedi Klimov.
Müessise yolbaşçısınıñ bildirgenine köre, paratsetamol koronavirustan tedaviylemey ve qırımlılarğa onı satın almağa acet yoq.
Paratsetamol qıtlığı Aqyarda da qayd etile. Bazı aphaneler paratsetamol yoq dep, onıñ yerine başqa ilâclar teklif ete.
Daa evel Ukraina aq qorçalayıcıları yarımada aphanelerinde maska, antiseptik ve paratsetamol yetmegenini qayd etken edi.
Martnıñ 30-nda Qırımda 2801 insan tibbiy közetüv altında buluna, 62 insan – hastahanede, 10 kişi – observatorlarda.
Martnıñ 27-nde işğal etilgen Qırımda restoran, qave, bar, aşhane, bufet ve diger aş müessiselerini vaqtınca qapatmağa qarar alındı. Sımarış berip almaq ve evge sımarış etmek imkânı olacaq.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
