Rusiyeniñ Rostov vilâyetiniñ yolbaşçısı Yuriy Slüsar yanvarniñ 10-nda saba erte regionğa eñ az 16 dron ücüm etti, dep bildirdi.
Onıñ aytqanına köre, Krım köyünde bir istisal müessisesinde yanğın çıqtı, sabağa qarşı yanğın söndürildi. Vali müessiseniñ adını bildirmedi. «Eto Rostov» yerli Telegram kanalı yanğın yer qaplamalarını yapqan «PlastFaktor» zavodında olğanını bildire.
Mâsnikov rayonınıñ Çaltır köyünde dronlarnıñ ücümi mustaqil evde yanğın çıqtı, yanında turğan maşinalar da yanıp ketti. Kuybışev rayonınıñ Krükov köyünde dronnıñ tüşmesi sebebinden yedi mesken evniñ ve mektepniñ pencereleri sındı, fasadlar ve damlar zarar kördi, dep iddia ete Yuriy Slüsar. Evelki malümatqa köre, kimse zarar körmedi.
Rusiyeniñ Mudafaa nazirligi bildirgenine köre, gece Rusiyeniñ ava mudafaa quvetleri Rostov, Kursk, Voronej, Brânsk, Belgorod vilâyetlerinde, Krasnodar ülkesinde ve Azaq deñizinde umumen 40 ukrayin dronını tutıp yoq etti.
Voronej vilâyetinde mustaqil evler ve maşinalar zarar kördi, dep haber etti vali Aleksandr Güsev. Brânsk vilâyetinde, vali Aleksandr Bogomaznıñ aytqanına köre, yaralanğan insan ya da yıqılğan bina yoq.
Ukrayinanıñ sahte malümatqa qarşı küreş merkeziniñ yolbaşçısı Andriy Kovalenko cuma künü sabasında Rusiyeniñ Rostov ve Leningrad vilâyetlerinde Rusiye Federatsiyası adiy zavodlar olaraq taqdim etken «gizli arbiy obyektlerge ücüm etildi», dep bildirdi.
Bundan da ğayrı, Rusiyeniñ Fevqulâde vaziyetler nazirligi qayd etkenine köre, Leningrad vilâyetiniñ Gatçina şeerinde sanayı alanında yanğın devam ete. Rusiye matbuatında bazı haberlerge köre, atseton çıqaruv müessisesi yana. Yanğınnıñ sebebi aqqında aytılmay.
Rusiyeniñ Ukrayinağa qarşı büyük ücümi başlanğanından berli Rusiye regionları muntazam sürette ateş ve dronlarnıñ ücümlerine oğray. Rusiyeniñ Mudafaa nazirligi Rusiyede raketalar ve dronlarnıñ tüşürilmesi aqqında haber ete. Kyiv bu haberlerni izaatlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
