Bu afta Rostov SİZOlarında, Qırımda tutulğan ve soñra Rusiyege çıqarılğan 19 ukrain siyasiy mabüs ile konsul körüşüvleri planlaştırıldı.
Bunı Rostov-na-Donu şeerindeki baş konsul Taras Malışevskiy "Gromadske radio"ğa bildirdi.
"Rusiye tarafından sebepsiz terrorcılıqta qabaatlanğan vatandaslarımıznı ziyaret etecekmiz. Olarnıñ arasında Aluşta, Qarasuvbazar, ekinci Bağçasaray, Qurman "Hizb ut-Tahrir davalarınıñ" iştirakçileri bar. Ve Saq şeerinden olğan Oleg Prıhodko", - aytıp berdi Malışevskiy.
Onıñ aytqanına köre, körüşüv vaqtında mabüslerniñ tutuluv şaraitleri ve saglıq alı teşkerilecek, bundan ğayrı advokatlarınıñ işi aqqında fikirlerini diñleycekler. Tuvğanlarından mektüplerni de bermege planlaştırıla.
"Baş konsullıq mabüslerniñ episine maddiy destek yapacaq. Er körüşüvniñ neticeleri aqqında ukrain matbuatına aytılacaq, daa tafsilâtlı haberler, koronavirus sebebinden mart ayından berli körüşme imkânından marum qalğan tuvğanlarına aytılacaq", - dedi Malışevskiy.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
