Advokat Edem Semedlâyev Rostov-na-Donu şeeriniñ №4 SİZOsında martnıñ 27-nde Rostov vilâyetinde Rusiye uquq qoruyıcıları tarafından tutulğan qırımtatar faali, vatandaş jurnalisti Remzi Bekirovnı ziyaret etti. Bu aqta Qırım.Aqiqat mühbiri haber ete.
Semedlâyevniñ bildirgenine köre, Rostov SİZOsına kelgende faalniñ köteklengeni belli oldı.
«Şahsiy urba ve ilk ihtiyac eşyaları şimdilik yoq. Rostov SİZOsına kelgende köteklengeni qayd etildi. Tutulğanda çantası ve 46 biñ ruble parası alındı. Remzi bu künleri çette qalmayıp, olarnı qasevet etken er keske teşekkürler bildirdi. Uzun bir ikâye olacağını bile, amma oña dayanmağa azır», – dep tarif etti Semedlâyev.
Remzi Bekirov advokatqa nasıl tutulğanlarını tafsilâtlıca aytıp berdi.
Martnıñ 27-nde dostlarınen beraber Rostov vilâyetiniñ Aksay şeerinde bulunğanını tarif etti. Anda qavede oturıp, kimseden saqlanmağan ediler. Bir kereden uquq qoruyıcılar kirdi, olarnı yatqızıp köteklemege başladı, esasen ayaqlarınıñ ust qısmını. Soñra olarnı tutıp, ellerini bağlağanlar. Tahminen altı saat Timaşevsk şeerine alıp ketken ediler. Anda başqa maşinağa FSBniñ Aqmescit hadimlerine mindirip, Qırımğa alıp ketkenler. Aqmescitke martnıñ 28-nde saba kelgenler», – dep tarif etti advokat.
Şu künü, advokatnıñ aytqanına köre, qabaatları aydınlatıldı, olar sorğuğa çekildi ve sıñırlav tedbirleri belgilendi. Ertesi künü, martnıñ 28-nde saba, tutulğan 23 kişi ava limanına ketirildi ve Rostov-na-Donuğa uçaqnen yollanıldı.
«Uçaqqa mindirdiler, başını kötermege izin bermey ediler, olar qayda ketkenlerini añlamay edi. Rostovğa kelgende qayda olğanlarını añladılar. Anda olarnı eki avtozakqa mindirip, çeşit SİZOlarğa alıp ketkenler. Al-azırda Remzi Rostov-na-Donunıñ №4 SİZOsında buluna – FSB yanındaki SİZO», – dep qoştı imayeci.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Martnıñ 27-nde Aqmescitniñ Kiyev rayon mahkemesi saba tutulğan doquz qırımtatar faalini apiske aldı. Martnıñ 28-nde Aqmescitniñ rayon mahkemesi martnıñ 27-nde tutulğan daa 14 qırımtatar faalini tevqif etti.
Aqmescitniñ Bavurçı qasabasında keçirilgen tintüv vaqtında semetdeşlerine qoltutmağa kelgenlerden eki kişi Eskender Mamutov ve Emil Ziyadinov da tutuldı. Aqmescit mahkemesi Ziyadinovğa «politsiyağa qarşı çıqqanı içün» 500 ruble para cezasını berdi. Mamutov ise 5 künge apiske alındı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
Martnıñ 29-nda Qırımnıñ Rusiye ombudsmeni Lüdmila Lubina Qırım.Aqiqatqabildirgenine köre, Qırımda tevqif etilgen 23 qırımtatar faalini Rusiyege alıp ketkenler.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
