Rusiyeniñ Rostov-na-Donu şeerinde patlav sesi eşitildi, dep haber eteler içtimaiy ağlarda.
161.ru neşiri yazğanına köre, şeerniñ bütün rayonlarından yerli sakinler patlavğa oşağan küçlü bir ses eşitti.
Baza Telegram kanalı yazğanına köre, mudafaa sistemaçı çalıştı.
Rostov vilâyetiniñ valisi Vasiliy Golubev bildirgenine köre, Rostov ve civarlarında eşitilgen sesler «uçaqnıñ daa yüksek süratqa keçmesinen» bağlı.
Ukrayına Mudafaa nazirligi Baş istihbarat idaresiniñ vekili Andriy Yusov Rusiye akimiyetiniñ Rostovdaki adisege cevabı «kerçekni inkâr etüv» ola, dep ayttı.
«Yahşı, ebet (Rusiyeniñ «uçaqnıñ yüksek süratqa keçüv» lafları – QA). Novgorodda ise strategik aviatsiya zarar körmedi. Balaban gögercinler kelip, bir şeyler atqandır. Moskvada bir patlav olmadı ve ava limanları deñişmesiz çalışadır. Er şey planlarına köre ketedir. Rejim vekilleri kerçeklerni ne qadar çoq inkâr etse, Rusiye sakinleriniñ sualleri o qadar çoq peyda olacaqtır», – dep ayttı o, ukrayın umummilliy telemarafonınıñ yayınında.
Onıñ aytqanına köre, Moskva Rusiyeniñ Ukrayınağa qarşı cenki «telükesizlik vaziyetiniñ kerginleşmesine, adise, patlavlar, strategik aviatsiya obyektleriniñ zarar körmesine sebep olğanını inkâr etip, rus dünyasınıñ parallel kerçeginde yaşamağa devam ete».
Avgustnıñ 21-nde Rusiye Mudafaa nazirligi Moskva vilâyetine saba eki kere uçucısızlar ücüm etti, dep bildirdi. Berilgen malümatqa köre, bir «uçaq tarzı uçucısız cihaz» Moskva vilâyetinde ava mudafaası tarafından qayd etildi ve radioelektron küreş vastalarınen bastırıldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
