Bağçasaraydaki ekinci «Hizb ut-Tahrir davasınıñ» mabüsi Timur İbragimov Aqmescitten Rusiyeniñ Rostov-na-Donu şeerindeki SİZOsına avuştırılğan soñ ilâcları alındı ve alâ daa qaytarılmadı. Bu aqta anası Niyara İbragimova bildirdi.
«Timur Rostov SİZOsına kelgen künü ihtiyacı olğan bütün ilâcları alındı ve alâ daa qaytarılmadı, dep ayttı. Timurnıñ aytqanına köre, tibbiy tedqiqi yapılmay, çünki o, yazma şekilde vazgeçken eken, amma bir şey yazmadı ve imza da onıñ degil. Bunıñ maqsadı ne olğanını men añlap olamayım», – dep ayttı Niyara İbragimova «Qırım birdemligi» cemaat birleşmesiniñ körüşüvinde.
Advokat Lilâ Gemeci, müvekkili, Bağçasaraydaki ekinci «Hizb ut-Tahrir davasınıñ» mabüsi Server Mustafayev Aqmescitten Rostov-na-Donu SİZOsına avuştırılğanda ilâcları alındı, dep bildirgen edi.
Rostov-na-Donu SİZOsınıñ memuriyeti bu malümatnı izaatlamay.
Noyabrniñ 15-nde Rusiyeniñ Rostov-na-Donu şeerindeki Cenübiy arbiy okrugınıñ mahkemesi Bağçasaraydaki ekinci «Hizb ut-Tahrir davasını» temelden baqmağa başladı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
