Rusiyeniñ Rostov-na-Donu Cenübiy arbiy okrugınıñ mahkemesinde salı künü, aprelniñ 27-nde, Bağçasaraydaki üçünci «Hizb ut-Tahrir davasınıñ» toplaşuvında Seytumer Seytumerovnıñ tintüvinde şaat olğan qabaatlav şaatı sorğuğa çekildi. Bu aqta «Qırım birdemligi» haber ete.
«Şaat Vedernikov qabaatlayıcığa Seytumer Seytumerovnıñ tintüvinde daa bir şaat ve operativcilernen iştirak etkenini bildirdi. Onıñ aytqanına köre, hadimler boş odalarğa bir özleri kirmegen edi. Mabüs Seytumerovnıñ evinde keçirilgen tahqiqat tedbirleri vaqtında bütün tehnika alındı ve edebiyat tapıldı», – dep bildire «Qırım birdemligi».
İmaye tarafı sorğu vaqtında şaattan Seytumerovnıñ evinde keçirilgen tintüvde operativciler ve vatandaş qıyafetinde insanlar olğanını, terciman ise berilmegenini bildi.
«Vedernikovnıñ özüni saba saat 4-te Aqmescit şeerinde tedbirlerde iştirak etmege davet etkenler», – dep tarif etti advokat Nazim Şeyhmambetov.
Şaat Vedernikovnıñ Rusiye mahkemesine bildirgenine köre, FSB onı şaat olaraq celp etmege istegende o, bilgisayar klubında bulunğan edi.
Qayd etilgenine köre, ondan çoq insannı sığdırğan mahkemege vekiller tek üç diñleyicini kirsetti. Böylece, Qırımdan Rostov-na-Donuğa yüzlernen kilometr yol keçken bir çoq soy-sop mahkeme oturışuvına öyle de kirip olamadı.
2020 senesi martnıñ 11-nde Bağçasarayda bir qaç qırımtatarınıñ evi tintildi: Enver Mustafayev, Amet Suleymanov, ağa-qardaş Seytumer ve Osman Seytumerovlar ve emceleri Rustem Seytmemetovnıñ. Tintüv «Qırım birdemliginiñ» sabıq faali Seytumer Seytumerovnıñ evinde de keçirildi. O, bir qaç yıl evelsi Qırımnı terk etti.
Tutulğanlar Ceza kodeksiniñ 205.5 maddesiniñ birinci qısmına (Terror teşkilâtınıñ faaliyetini teşkil etüv ve bu teşkilâtnıñ faaliyetinde iştirak etüv) istinaden qabaatlana.
Qırım Muhtar Cumhuriyeti ve Aqyar prokuraturası martnıñ 11-nde Bağçasarayda ve Bağçasaray rayonında Rusiye quvetçileri keçirgen tintüvlerden sebep cinaiy tahqiqat başlattı. Daa soñra müessise daa bir cinaiy tahqiqat başlatılğanını bildirdi – o, tintüvlerden soñ qırımtatarlarnıñ tutuluvınen bağlıdır.
Ukraina Tış işler nazirligi, martnıñ 11-nde olıp keçken tintüvlerge qarşı narazılıq bildirdi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
