Rostov-na-Donu Cenübiy okrugınıñ arbiy mahkemesinde birinci instantsiyada 77 cinaiy dava baqıla, 13-ü (10,1%) qırımtatarlarğa qarşı açılğan davadır, dep bildirdi advokat Edem Semedlâyev Facebook saifesinde.
«Bugünki künde Cenübiy okrugınıñ arbiy mahkemesinde, mahkeme malümatına köre, birinci instantsiyada 77 cinaiy dava bar. Olardan 13-ü qırımtatarlarğa qarşı – 10,1%. Cenübiy federal okrugına Rusiyeniñ sekiz subyekti kire, ealisi 16 498 642 insan ola», – dep yazdı advokat.
Rusiye Cenübiy okrugınıñ arbiy mahkemesiniñ qadısı Oleg Volkov birden üç qırımlı advokat Emil Kurbedinov, Edem Semedlâyev ve Nazim Şeyhmambetovğa qarar çıqardı. Bu advokatlar Aqmescitteki ekinci «Hizb ut-tahrir davası» mabüsleriniñ menfaatlarını temsil ete. Qadı imayeciler 2021 senesi mayısnıñ 11-nde ve 12-nde Raim Ayvazov, Remzi Bekirov, Riza İzetov, Şaban Umerov ve Farhod Bazarovnıñ esnaslarına kelmegeni içün qarar çıqardı.
Advokatlar mayısnıñ 4-nden 8-ne qadar iş yolculığında olğanını aytıp, Rospotrebnadzor koronavirus PCR testleriniñ neticeleri çıqqanına qadar izolâtsiyada qalmalarını ayttı, dep bildirdi. Test yapqan laboratoriyalar ise tek mayısnıñ 11-nde çalışıp başladı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
