Rostov-na-Donudaki Şimaliy-Kavkaz okrugınıñ arbiy mahkemesi Yaltadaki «Hizb ut-Tahrir davasınıñ» mabüslerini daa 2 ayğa apiste qaldırdı. Bu aqta Qırım.Aqiqat mühbiri haber ete.
Qadı Anatoliy Kolesnik Muslim Aliyev, İnver Bekirov, Vadim Siruk, Emir-Usein Kuku, Refat Alimov ve Arsen Cepparovnıñ temyiz arizalarını red etti. Olar avgustnıñ 18-ne qadar tahqiqat izolâtorında tutulacaq.
İmaye, mabüslerniñ üç yıldan berli SİZOda tutulğanını qayd etip, sıñırlav tedbirini er angi başqasına deñiştirmege muracaat etti.
Prokuror imayeniñ muracaatına qarşı çıqıp, mabüsler mahkemeden saqlana, şaatlarnı qorquza bile, dep bildirdi.
«Temyiz arizaları qanaatlendirilmedi. Mabüslerniñ er biri sıñırlav tedbiri qanunsız uzatılğanını delillernen isbatlağanı içün apis müddetini uzatuv üç saat devam etti», – dedi advokat Edem Semedlâyev.
Müslim Aliyev qabaatlav tarafınıñ sıñırlav tedbirini uzatmaq muracaatını dava temelini baqqan qadı baqa, dep qayd etti. Qabaatlanğanlarnıñ fikirince, bu adil qararnıñ çıqarılmasına keder ete.
Aprelniñ 4-nde Rostov-na-Donudaki Şimaliy-Kavkaz okrugınıñ arbiy mahkemesi «Yaltadaki Hizb ut-Tahrir davasınıñ» temelini ekinci kere baqmağa başladı.
Dava boyunca qabaatlanğan Arsen Cepparov, Refat Alimov, Emir-Usein Kuku, Muslim Aliyev, İnver Bekirov ve Vadim Siruk 2016 senesi fevral-aprel aylarında Yaltada tutulğan ediler. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatladılar.
Ukraina Tış işler nazirligi Rusiyeden Yaltadaki «Hizb ut-Tahrir davasınıñ» mabüslerini azat etmesini talap ete.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
