Rostov vilâyetiniñ bir qaç şeer sakini patlavğa oşağan bir ses eşitti, – dep haber ete 161.RU yerli neşiri içtimaiy ağlarda oquyıcılarnıñ haberlerine esaslanıp. Malümatnı TheInsider menbaları da tasdıqlay.
Patlav eşitilgen noqtalar arasındaki mesafe aman-aman 200 kilometr – şimalde Novoşahtinskten cenüpte Yeyskke qadar, dep yaza 161.RU.
Oquyıcılarnıñ bildirgenine köre, bazı yerlerde qoralar titredi, Peşkovo köyünde üç-dört yerde qara tuman köründi. Rostov-na-Donuda maşinalarnıñ signalizatsiyası çalıştı, TheInsider manbaları bildirgenine köre, patlavlar şeerniñ üç yerinde eşitildi, amma tuman olmadı.
Baza neşiri şaatlarnıñ foto ve videolarına esaslanıp, Taganrogda ava mudafaa sisteması çalışa, Çaltır köyü yaqınlarında ise (Rostov-na-Donudan tahminen 20 kilometr) qara tuman körüne. Tüşürilgen raketa aqqında «DNR» silâlı gruppirovkasınıñ sabıq komandanı İgor Strelkov (Girkin) yaza.
Rostov vilâyetindeki Fevqulâde vaziyetler baş idaresiniñ matbuat hızmeti 161.ru-ğa bildirgenine köre, patlavlar ya da diger fevqulâde vaziyetler aqqında malümat yoq. Region akimiyeti vaziyetni izaatlamadı.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
