Rusiyede sentâbr ayında 9798 koronavirus hastası vefat etti, dep aytıla Rosstat malümatında. Derc etilgen malümatqa köre, 4329 rusiyeliniñ esas ölüm sebebi olaraq qayd etildi. Daa 870 kişiniñ esas ölüm sebebi olaraq tahmin etile, amma bunı isbatlamaq içün qoşma tibbiy tedqiqler kerek.
1401 insanda koronavirus diger hastalıqlarını ağırlaştırdı ve ölümini tezleştirdi. 3198 insannıñ koronavirusı qayd etildi, amma, tahmin etilgenine köre, ömrüni qısqartmadı.
Avgust ayında, Rosstat malümatına köre, 7,5 biñ koronavirus hastası vefat etti, 10 biñ iyül ayında ve aman-aman 12 biñ iyün ayında vefat etti, mayıs ayında vefat etkenlerniñ sayısı 12 452 kişi, aprel ayında ise 2712 insan oldı. Bu raqamlar COVID-19 tarqaluvı ile küreş federal operativ ştabınıñ statistikasından pek farqlı ola.
Aprel ayından sentâbr ayına qadar Rusiyede 128 biñ aşırı ölüm qayd etildi – yani memlekette ölüm sayısı beklegeninden ziyadedir. Bir çoq ekspert bunı yañı çeşit koronavirus yuqunçınen bağlay. Federal ştab malümatına köre, hastalıqtan dört qat az insan vefat etti – 30 251.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
