Qırım ve Aqyardaki Rospotrebnadzor idaresiniñ yolbaşçısı Natalya Penkovskaya bildirgenine köre, Qırımda koronavirus hastalarınıñ sayısı biraz eksilse de, yaqın aftalarda bu virus tarqaluvınıñ artması beklenile.
«Soñki eki afta keçken aftalarğa baqqanda hasta sayısı biraz eksile. Keçken aftağa baqqanda şimdi hasta sayısı 0,8% arttı. Bu yañı yıl bayramlarından çıquv raqamlarıdır. Soñki künlerniñ raqamları arta ve, mence, kelecek afta yarımadada hasta sayısını aks etecek tarafsız raqamlarnı körecekmiz», – dedi Penkovskaya yanvarniñ 13-nde COVID-19 ile küreş operativ ştabınıñ toplaşuvında.
Onıñ malümatına köre, 65 yaştan büyük hastalarnıñ sayısı 30% arttı.
«Bunı em vefat sayısında, em yañı koronavirus hastalarınıñ sayısında köremiz. Bunı bu künleri olğan faalliknen bağlaymız – soy-sop ve büyüklerni ziyaret etüv, elbette, kelecek eki-üç afta devamında bu hasta sayısına tesir etecek», – dedi Penkovskaya.
Keçken künü Qırımda 213 koronavirus hastası qayd etildi. Qırımnıñ Rusiye yolbaşçısı Sergey Aksenov bildirdi ki, koronavirus pandemiyası sebebinden cemaat aşağan yerlerniñ iş sıñırlavları yanvarniñ 15-nde lâğu etile.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
