Qırım ve Aqyardaki Rospotrebnadzor idaresiniñ yolbaşçısı Natalya Penkovskayanıñ bildirgenine köre, işğal altındaki yarımadada koronavirus hastalarınıñ sayısı artmağa devam ete. Bu aqta o, mayısnıñ 20-nde COVID-19 tarqaluvı ile küreş operativ ştabınıñ toplaşuvında ayttı.
«Soñki künleri hasta sayısı çoq olmasa da, hasta sayısı artmağa devam ete. Bugünki vaziyetniñ istisna olğanını añlamaq kerek… Eñ yüksek seviye keçken afta qayd etildi. Qayd etilgen hastalarnıñ büyük qısmınıñ klinik alâmetleri yoq. Lâkin keçken aftağa baqqanda alâmetsiz fayız 46%-dan 38%-ğa eksildi», – dep qayd etti o.
Qırımnıñ Rusiye yolbaşçısı Sergey Aksenov qırımlılarnı koronavirus vaqtında cenazege barmaqtan vazgeçmelerine çağırdı.
Keçken künü Qırımda bir koronavirus hastası qayd etildi – Kefede.
Bugünge qadar 299 koronavirus hastası qayd etildi. 25-i çetelden keldi, 31-i – Rusiyeden. 122 insan tüzeldi, 9 insan vefat etti. Umumen yılnıñ başından berli Aqyarda 143 kişi koronavirus yuqunçına oğradı, eki insan vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
