Qırımdaki Rospotrebnadzor idaresi işğal altındaki yarımadada içilgen suv keyfiyeti aqqında esabat berdi. İdareniñ malümatına köre, 2018 senesi Qırım suvınıñ 6,1%-ı gigiyena normalarına uymadı. Ekseriy allarda suvnıñ albavı, umumiy mineralizatsiyası, hlorid, sulfat, renk, bulanıqlıq, nitratları normadan tış qayd etildi.
Haber etilgeni kibi, sanitar-himiyeviy köstergiçlerge köre gigiyena normalarına uymağan içilgen suv eñ çoq Krasnoperekopsk, Ermeni Bazar, Kezlev, Saq şeerlerinde, Krasnoperekopsk, Saq, Aqşeyh, Aqmeçit, Curçı, Yedi Quyu, Aqmescit rayonlarında qayd etildi.
Bundan ğayrı, keçken sene suv nümüneleriniñ 1,5% mikrobiologik köstergiçlerge köre gigiyena normalarına uymağan edi. Bu köstergiç Qırımnıñ umumiy köstergiçine köre Yedi Quyu, Qurman, Aqmescit, Bağçasaray, Qarasuvbazar rayonları ve Keriçte daa yüksek.
Fevral ayınıñ soñunda vaqtınca işğal etilgen topraqlar meseleleri naziriniñ birinci muavini Yusuf Kürkçi bildirdi ki, işğal etilgen Qırımnıñ 5 sakininden biri keyfiyetli suvğa irişip olamay.
2019-2020 seneleri Rusiye kontrolindeki Qırım akimiyeti Qarasuvbazar rayonındaki Tayğan suv anbarından yarımada şimalini suvnen temin etecek suv borusını qurmağa planlaştıra. Yanvar ayında Qırımnıñ Rusiye akimiyeti suvnı Qarasuvbazar suv anbarından qomşu Tayğanğa bermege başlağan edi.
«Tayğan» arslanlar parkınıñ saibi Oleg Zubkovnıñ fikirince, Qarasuvbazar suv anbarları şimaliy Qırımdaki suv problemini çezip olamaz.
Qırımda Ermeni Bazarnıñ suvnen temin etilüvini eyiliştirmek ve «Krımskiy titan» ve «Krımskiy sodovıy zavod» müessiselerini tehnik suvnen temin etmek içün Şimaliy-Qırım kanalınıñ rekonstruktsiyasını yapacaq olalar.
Leyha müellifiniñ fikirince, Şimaliy-Qırım kanalınıñ yañı obyektleri çalışıp başlasa, «Krasnoperekopsk, Canköy ve Seyitler rayonındaki meskün yerlerniñ suvnen temin etilüvi eyiliştirilecek».
Ukraina Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminley edi. 2014 senesi Rusiye Qırımnı işğal etken soñ, yarımadağa suv berilmesi toqtatıldı.
