Romaniya Mudafaa nazirligi bildire ki, gece Rusiye uçucısız uçağı Romaniya ava boşluğına kirip, Ukrayina ile sıñır yanındaki Galats şeerinde çoq qatlı evge uruldı, neticede yanğın çıqtı. Yerli akimiyet eñ azından eki yaralanğan kişi aqqında bildire.
"Quralaynıñ 28-nden 29-na keçken gecesi Rusiye Federatsiyası Romaniya ile sıñır yanında Ukrayinadaki vatandaş ve infrastruktura obyektlerine uçaqsız uçaqlarnıñ ücümlerini yañıdan başladı. Uçaq Romaniya ava boşluğına kirdi, Galats belediyesiniñ cenübiy qısmında radarlar tarafından közetile edi ve çoq qatlı evniñ damına tüşti, bundan soñ yanğın çıqtı", — dep aytıla Mudafaa nazirliginiñ haberinde.
Fevqulâde vaziyetler hızmetiniñ bildirgenine köre, eki insanğa tibbiy yardım kerek edi ve yanğın söndürildi. 70 insan tahliye etildi.
Romaniya Mudafaa nazirligi, Rusiye Ukrayinağa ücüm etkende eki F-16 qırıcı uçağını ve arbiy helikopterni közetüv içün avağa kötergenini bildirip, uçucılarnıñ pilotlarsız uçaqlarnı urmağa ruhsetleri bar olğanını qoştı.
NATO ve Avropa Birliginiñ azası olğan Romaniyanıñ Ukrayina ile 600 kilometrden ziyade sıñırı bar. Rusiyeniñ Ukrayina cenübindeki limanlarına ücümleri başlağanından berli Romaniya akimiyeti RF dronlarınıñ memleketniñ ava boşluğına kirgenini bildirgen edi. Amma Quralaynıñ 29-nda Romaniyada ilk sefer bir evge dron uçtı ve adamlar yaralandı.