CRPE România ukrain ve çetel ekspertlerniñ ve vatandaş cemiyetiniñ temsilcileriniñ iştiragi ile Qırımğa bağışlanğan munaqaşanı teşkil etti, dep haber ete Ukrainanıñ Romaniyadaki elçiligi.
Elçilikniñ malümatına köre, "Qırım platforması: Qırım meselesine yañı yanaşma ya da simvolik numayış?" adlı munaqaşada Ukrainanıñ meselelerinde Romaniyadaki muvaqqat vekili Paun Rogovey iştirak etti.
"Keçirilgen munaqaşa Qırım MC ve Aqyar şeeriniñ işğalden azat etilmesi yolları ve Ukrainanıñ teşebbüsi ile yaratılğan "Qırım platforması" halqara meydançığınıñ faaileti ile bağlı ekspertlerniñ fikir deñişmesi içün müim yer oldı. Paun Rogovey munaqaşa vaqtında Qırımda ve Aqyarda telükesizilk vaziyetine, ukrain topraqlarınıñ işğalden azat etilmesi içün Ukraian ve dünya toplulığı tarafından körülgen çarelerge diqqat çekti", - dep yazıla bildirmede.
Ukraina TİN ve "Qırım platformasınıñ" ekspert ağı tedbirler, konferentsiyalar, seminarlar ve tögerek masalar keçirmek, mustaqil taliliy merkezlerniñ araştırma leyhalarını desteklemek ve "Qırım platformasınıñ" ilerideki inkişafı içün işbirlik aqqında memorandum imzaladılar.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
