Rusiye gece "Şahed" uçucısızlarınen Romaniya sıñırındaki "Orlovka" halqara parom keçitine ücüm etti, dep haber ete sentâbrniñ 1-nde Devlet sıñır hızmeti.
Sıñırcılar binağa ve keçiş noqtasına darbeler endirilgenini qayd etti – yanğınlar başladı, qurtarıcılar olarnı söndürdi.
"Al-azırda bu keçiş noqtasında vatandaş ve naqliyat vastalarınıñ qaydı vaqtınca toqtatıldı. Bu aqta Romaniya tarafına malümat berildi. Naqliyat diger keçiş noqtalarına yollanıla", – dep aytıla haberde.
Hızmet, devlet sıñırını keçmege planlaştırğanda bu malümatnı köz ögüne almağa rica ete.
Romaniya Tış işler nazirligi al-azırda bu malümatnı izaatlamadı.
"Orlovka" keçit noqtası Rusiye ücümleri neticesinde zarar kördi. 2025 senesi noyabr ayında ateşten soñ zarar körip, işini vaqtınca toqtatqan edi.