Canköy rayonında Rusiye uquq qoruyıcıları «qırımlı musulmanlar davasının» mabüsi Riza Ömerovnıñ qaynatası Amet Bairovnıñ evinde tintüv keçire. Bu aqta «Qırım birdemligi» haber ete.
Aq qorçalayıcılar qayd etkenine köre, azbarğa kimse kirsetilmey.
Tintüvden soñ Bairovğa bir vesiqa qaldırılmadı, dep bildire aq qorçalayıcılar.
«Baqalar, dep aytqanlar. Patlayıcı madde qıdırğanlar, ayttım – yañlış yerdesiñiz, mende tek araba parçalarını tapa bilesiñiz. Bir protokol qaldırılmadı, vesiqalarnıñ fotoresimini yapmağa izin berilmedi. FSB hadimi soyadını ayttı – Kudrin», – dep izaatladı 57 yaşında qırımtatarı.
Riza Ömerov – «qırımlı musulmanlar davası» boyunca «Qarasuvbazar gruppasınıñ» mabüsi. Rusiyedeki mahkeme onı «Hizb ut-Tahrir» teşkilâtında iştirak etkeninde qabaatlap, 13 yıl sert rejimli koloniyada qalmasına üküm etti.
Avropa elçileri bu mahkeme qararını takbih etti. Olar qırımlılarnı azat etmege çağırdı.
«Qırım birdemligi» bildirgenine köre, yarımadada «qoranta repressiyaları» arta. Aq qorçalayıcılar Qırımda siyasiy mabüslerniñ cedvelini incelep, apiske alınğan ve mahküm etilgen ekiden dört kişige qadar bir-biriniñ soyu olğan 17 qoranta bar olğanını qayd etti.
Avgust ayında Ukrayına prezidentiniñ Qırımdaki temsilciligi qanunsız tutulğan 180 yarımada sakini aqqında bildirdi. 117-si – qırımtatarıdır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
