Rusiye mahkemesi tarafından mahküm etilgen «qırımlı musulmanlar davasınıñ» «Qarasuvbazar gruppasınıñ» mabüsi Riza Ömerov Krasnoyarsk ülkesiniñ Minusinsk apishanesinde başlağan köz problemlerinden evel tibbiy yardımğa muhtac.
Bu aqta «Qırım birdemligi» cemaat birleşmesi advokat Mariya Terehovanıñ malümatına esaslanıp bildire.
Advokatnıñ aytqanına köre, Ömerov sol közünen etrafqa baqqanda çizgi körip başladı. Rusiye apishanesinde köz ekimi yoq, qırımlı kerekli tibbiy yardım alıp olamay.
Terehovanıñ aytqanına köre, Ömerovnıñ körüşüv problemleri peyda oldı. O, iyünniñ 15-ne ariza berdi, amma ariza üç ay ögüne berilecek dep izin bermediler. Riza körüşüv içün daa bir kere muracaat etti, amma apishane yolbaşçısı bu sefer de izin bermeyip, qoranta içün kelişken başqa bir kün berecek dedi.
2019 senesi iyünniñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtınıñ faaliyetini teşkil etüv ya da iştirak etüv) çerçivesinde keçirile ve «Hizb ut-Tahrir» teşkilâtınen bağlı, dep bildirdi.
Rusiyedeki mahkeme 2021 senesi yanvarniñ 12-nde Riza Ömerovnı Rusiye Ceza kodeksiniñ 205.5 maddesine istinaden (terror teşkilâtınıñ faaliyetini teşkil etüv ya da iştirak etüv) «Hizb ut-Tahrir» teşkilâtında iştirak etkeninde qabaatlap, 13 yıl sert koloniyada qalmasına üküm etti.
Avropa elçileri bu mahkeme qararını takbih etti. Olar qırımlılarnı azat etmege çağırğanlar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
