İşğal etilgen Qırımnıñ Rusiye Yuqarı mahkemesi Rusiye Federatsiyasınıñ Cezalarnı yerine ketirüv federal hızmetiniñ onı yarımadağa daa yaqın bir koloniyağa avuştırılmasında red qararına itiraz bildirgen aq qorçalayıcı mabüs Riza İzetovnıñ muracaatını qanaatlendirmedi. Bu aqta "Qırım birdemligi" uquqçı Nazim Şeyhmambetovnıñ malümatına esaslanıp yaza.
2025 senesi dekabr ayınıñ ortasında birinci qurulış mahkemesi İzetovnıñ dava talaplarını red etti.
Uquqçı Şeyhmambetovnıñ qayd etkenine köre, Riza İzetov koloniyada tutulğan Qırımdan Yakutskqa qadar mesafe doquz biñ kilometrden ziyade ola. Aq qorçalayıcınıñ anası qanser hastası. Şimdi pensiya ala ve yılda bir kere oğlunı körmek içün maddiy imkânı olmağanından oğlunı körip olamay.
"Mahkeme, Cezalarnı yerine ketirüv federal hızmeti kibi, anasınıñ maddiy imkânları, sağlıq vaziyetine emiyet bermek kerek edi. Amma deliller köz ögüne alınmadı", – dep tarif etti Şeyhmambetov.
İzetov Vladimirdeki apishanede tutula, ceza şaraitleri sertleştirilgen soñ Yakutsk koloniyasından anda avuştırıldı. Yakutsk İK-1-de er adam "büyük cinayetçii" tanılıp, mahkeme ükmünen ilk üç yılını keçirgen apishanege qaytarıldı.
İzetov oturışuvda videokonferentsiya vastasınen iştirak etti. O, dindaşlarını Ramazan ayınen ve kelecek bayramlarnen hayırladı, ve er keske "adalet, sabır, amanlıq" tiledi.
2023 senesi saban ayınıñ 10-nda Rostov-na-Donu Cenübiy okrugınıñ arbiy mahkemesi Remzi Bekirov, Riza İzetov, Raim Ayvazov, Farhod Bazarov ve Şaban Umerovnıñ ükümlerini çıqardı. Olarnı Rusiye Federatsiyası Ceza kodeksiniñ 205.5 maddesiniñ 1-inci qısmına istinaden ("Terror teşkilâtınıñ faaliyetini teşkil etüv") qabaatlağanlar. Qalğanları – Rusiye Federatsiyası Ceza kodeksiniñ 205.5 maddesiniñ 2-nci qısmına istinaden ("Terror teşkilâtınıñ faaliyetinde iştirak etüv"). Dava mabüsleri Rusiye Federatsiyası Ceza kodeksiniñ 30-ıncı maddesiniñ 1-inci qısmı ve 278-inci maddesine istinaden ("Akimiyetni zorbalıqnen zapt etüv azırlığı") qabaatlandı.
2019 senesi saban ayınıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden "Qırım birdemligi" faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan "Hizb ut-Tahrir" teşkilâtında iştirak etkeninde qabaatlanğan 24 faal tutulğan edi. 2019 senesi saban ayınıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
"Memorial" aq qorçalayıcı merkezi 2019 senesi saban ayınıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.