Rheinmetall Almaniya kontserni Almaniya ükümetinden Ukrayina ordusına 120 milimetrlik mina topralı içün tahminen 100 biñ top mayını yapmağa ve teslim etmege sımarış alğan. Bunı şirketniñ matbuat hızmeti haber ete.
Kontserniñ bildirmesinde bu top mayınlarnıñ teslimatı Almaniya ükümetiniñ sentâbrniñ soñunda ilân etken 400 million yevrolıq arbiy yardım paketine kire eken.
Teslimat yaqın vaqıtta başlaycaq ve eki yıl devam etecek, dep bildirdiler Rheinmetall şirketinde.
Evel Ukrayina baş naziri Denis Şmıgal, oktâbrniñ 18-nde "Rheinmetall - Ukrayina mudafaa sanayısı" ortaq alman-ukrayin işhanesi qayd etilgenini bildirgen edi.
Oktâbrniñ 24-nde Berlinde Almaniya-Ukrayina biznes forumı çerçivesinde Ukrayina baş naziri Denis Şmıgal ve Almaniya kantsleri Olaf Şolts arasında aytışmalar olıp keçken edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
