Link açıqlığı

Saatnıñ esas haberi

RFE/RL: Rusiye akimiyeti Qırım.Aqiqat müellifi Semenanı azat ete, amma region aqqında malümatnı blok etmege devam ete


RFE/RL presidenti Jamie Fly

İşğal etilgen Qırımnıñ Rusiye akimiyeti Qırım.Aqiqat müellifi, qırımlı jurnalist Mıkola Semenanı azat ete, amma «region aqqında malümatnı blok etmege devam ete». Bu aqta «Serbest Avropa Radiosı/Azatlıq Radiosı» (RFE/RL) beyanatında aytıla.

RFE/RL prezidenti Jamie Fly Mıkola Semenanıñ Rusiye mahkümiyeti lâğu etilgeninen tebrikledi.

«Mıkola serbest bir insan olğanına dair haberlerge pek quvanamız – qorantasınıñ yanında olıp, kerekli tibbiy yardım ala ve, elbette, yaza bile», – dep qayd etti RFE/RL prezidenti.

Jamie Fly, işğal etilgen Qırımda Mıkola Semenanıñ taqip etilüvi siyasiy sebeplernen bağlı, dep qoştı.

Daa evel Mıkola Semena Rusiye kontrolindeki Aqmescit Jeleznodorojnıy rayon mahkemesinden sınav müddetiniñ vaqtından evel toqtatıluvı ve mahkümiyetiniñ lâğu etilüvi aqqında qararnı teslim aldı.

Yanvarniñ 14-nde Rusiye kontrolindeki Aqmescitniñ Jeleznodorojnıy mahkemesi advokat Aleksandr Popkov ve qırımlı jurnalist Mıkola Semenanıñ sınav müddetini vaqtından evel toqtatmaq ve mahkümiyetini almaq muraacaatını baqıp qanaatlendirdi.

Mıkola Semena – qırımlı jurnalist, Qırım.Aqiqat müellifi, Ukrainada nam qazanğan jurnalist. 2016 senesi aprel ayında Mıkola Semenanıñ evine FSB hadimleri kelip tintüv keçirdi. Daa soñra jurnalistniñ yarımadanıñ vatandaş qamaçavına dair maqalesi sebebinden cinaiy dava açıldı, dep bildirgenler. Qırım.Aqiqat saytınıñ «Fikir» rubrikasında derc etilgen maqaleni Rusiye tahqiqatçıları Rusiye topraq bütünligini bozmaq çağıruvı (Rusiye topraq bütünligini bozmaq açıq çağıruvları (Rusiye Ceza kodeksiniñ 280.1 maddesi) olaraq tanıdı.

2017 senesi sentâbrniñ 22-nde Aqmescitteki Rusiye mahkemesi Semenanı üç yıl sınav müddeti ve üç yıl açıq faaliyetnen oğraşmaq yasağı ile eki buçuq yılğa şartlı olaraq apiske almağa qarar berdi. Şu yılnıñ dekabr ayında Kreml kontrolindeki Qırım Yuqarı mahkemesi Semenanıñ ükmüni qısmen yımşatıp, açıq faaliyet yasağını eki yılğa qısqarttı.

Mıkola Semenanıñ bildirgenine köre, öz maqalelerinde o, «fikirni serbest bildirüv» aqqını qullanğan edi.

Ukraina Tış işler nazirligi, ABD Devlet departamenti, Avropa Birligi ve bir sıra halqara teşkilât Semenağa çıqarılğan ükümni takbih ettiler.

Radio Free Europe/Radio Liberty sabıq prezidenti Tom Kent jurnalist Mıkola Semenağa qarşı qabaat delilsiz ola, dep aytqan edi. O, Kreml kontrolindeki Qırım mahkemesiniñ qararı lâğu etilmeli, dep qayd etken edi.

Mıkola Semenanıñ imaye tarafı Aqmescitteki Rusiye mahkemesiniñ qararını Avropa insan aqları mahkemesine şikâyet etti. Lâkin Avropa mahkemesi Mıkola Semenanıñ şikâyetini prioritetli baqmağa razı olmadı.

XS
SM
MD
LG