Boşnıñ 13-ne keçer gecesi Rusiye arbiyleri Ukrayinağa 117 "Şahed" tipindeki (63-i reaktiv), "Gerbera" tipindeki, "Parodiya" tipindeki dron-imitatorlarnen ücüm etti, dep bildirdi Ukrayina Silâlı quvetleri. Olarnıñ malümatına köre, dronlar Rusiye Federatsiyasınıñ beş yönelişinden ve ilhaq etilgen Qırımnıñ Sarabuz qasabasından uçurıldı.
İlk malümatqa köre, saat 07:30-ta ava mudafaası tarafından 80 duşmannıñ "Şahed" tipindeki dronları (39-ı reaktiv), "Gerbera" ve diger tiplerdeki uçaqları urulıp tüşürildi. Bir qaç ücüm uçaqları alâ daa avada, arbiy işler devam ete.
Ukrayina Silâlı quvetleriniñ Ava quvetlerinde qayd etkenlerine köre, 24 yerde uruluvlar qayd etildi ve 10 yerde parçalar tüşti.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.