Ukrayina destegine aktsiya keçirgeni içün Rusiyede 15 yıl apis cezasına mahküm etilgen Bogdan Ziza Permdeki 29 sanlı rusiye tüzetüv cazenasinde buluna. Bunı "Birdemlik zonası" cemaat teşebbüsi Zizanıñ mektübine atfı etip bildire.
"Bogdannen yazışqan dostu bugün siyasiy mabüsten eki mektüp alğanını "Birdemlik zonanası"na bildirdi. Ziza, istinaf şikâyeti baqılğan soñ Novoçerkasktaki SİZO-dan etap etilgenini yazdı. Bu vaqıt içinde o Volgograd, Saratov, Qazan ve İjevskte olğan. Bundan evel ondan mektüpler ne içün olmağanı belli degil. Yaqınları ve dostları bütün bu vaqıt onıñ bulunğan yeri aqqında bir şey bilmey ediler", - dep yazıla bildirmede.
İyünniñ 6-nda Rusiye mahkemesi kezlevli ressam Bogdan Zizanı tuvğan şeerinde keçirgen cenkke qarşı aktsiyası içün 15 yıl apis cezasına mahküm etti.
2022 senesi mayıs ayında Kezlevli Bogdan Ziza Kezlev memuriyetiniñ binasınıñ fasadında mavı ve sarı boya ve yanıcı qarışmanıñ izleri aşkâr etilgen zaman Rusiye quvetçileri tarafından yaqalandı. Ertesi künü Qırım televizionı kezlevliniñ qırımlılar ögünde "tövbesini" kösterdi. Bu kibi videolar Rusiyeniñ Ukrayinağa qarşı büyük istilâsı başlanğandan berli Rusiye tarafdarı telegram kanalları ve haber vastalarında cenkke qarşı narazılıqlarğa açıq takbih kibi sıq-sıq rastkelinir. Bogdan Zizanıñ yaqınları onıñ üzerinde bedeniy küç qullanğanına dair alemetlerni körip, onıñ iskencege ögratılması ihtimalınıñ olğanını bildirdiler. Tutulğan soñ Bogdan Zizanı başta "Rusiye silâlı quvetlerini itibardan tüşürgeni" içün para cezasına mahküm ettiler, soñra tevqif ettiler. O vaqıttan berli o SİZO-da buluna. Bogdan Rusiye Ceza qanunnamesiniñ üç maddesine binaen qabaatlana. Qabaatlavlar arasında terrorcılıq da bar, bunıñ içün o 15 yıl apis cezasına mahküm etile bile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
