RF quvetçileri qırımtatar uquq qoruyıcısı Abdureşit Cepparovğa qarşı "Rusiye ordusını itibardan tüşürüv" ve "malümat azatlığı suistimalı" maddeleri ile eki yañı memuriy dava açqan.
Bunı öz menbalarına atfı etip ZMINA uquq qoruyıcı teşkilâtı haber ete.
Uquq qoruyıcılarnıñ haber etkeni kibi, Rusiye quvetçileri tarafında açılğan memuriy davalarnıñ "Cepparovnıñ iştiragi olmadan işğalciler tarafından tizilgen sahte protokolları" bar.
"Qabaatlavlarnıñ asılı şundan ibarettir ki, uquq qoruyıcı güya Qırımda halqara gumanitar uquqınıñ bozulması ile bağlı baqmalarnı ve yarımadada insan aqlarınıñ bozulması ile bağlı operativ beyanatlra derc etilgen "Qırım ğayesi" teşebbüsiniñ saifesini idare ete", - dep haber ete ZMINA.
Cepparov ise bu qabaatlavlarğa razı degil. Onıñ sözlerine köre, "Qırım ğayesi"niñ yaratılmasına alâqası olsa da, al-azırda bu uquq qoruyıcı leyhasınıñ faaliyetine alâqı yoq eken.
Aprelniñ 25-nde saba saat 7-lerde Cepparovnıñ evinde tintüv keçirilgen edi. Evde ömür arqadaşı ve 14 yaşında qızı edi. Cep telefonları alınğan ve advokatnı çağırmağa izin berilmegen edi. Tintüvden soñ Rusiye uquq qoruyıcıları qırımlı cemaatçını tutıp alğan edi. Aprelniñ 26-nda Rusiye kontrolindeki Qırımnıñ Qarasuvbazar rayon mahkemesi tutulğan qırımtatar aq qorçalayıcısı Abdureşit Cepparovnı "poliske riayet etmegeni" içün 12 künge apiske alğan edi.
Abdureşit Cepparov ilk sefer tutulmay. Bıltır mart ayında da evi tintilgen edi. Bundan soñ Rusiye kontrolindeki Qarasuvbazar rayon mahkemesi aq qorçalayıcı ve qırımtatar milliy areketiniñ veteranını apiske alğan edi. O vaqıt Cepparov içtimaiy ağlarda «natsist atributikasınıñ ve timsalleriniñ propagandası» qabaatı ile 15 künge apiske alınğan edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
