Qırım.Aqiqat Aqyardaki RF Qara deñiz flotunıñ ştabına endirilgen raketa darbesiniñ aqibetleriniñ satellit resimlerinı yayınladı.
Raketa ücüminden evel (sentâbrniñ 21) ve soñ (sentâbrniñ 22) yapılğan Planet Labs Amerika şirketiniñ resimlerinde cuma künü kündüz ştabnıñ binası ciddiy zararğa oğrağanı körüne.
Aynı zamanda tüsses ve yıqıluvlar kâinattan bile körüne.
Sentâbrniñ 22-nde kündüz işğal altındaki Aqyarda bir qaç patlav aqqında haber etildi. Şeerniñ Rusiye valisi Mihail Razvojayev Telegramda Rusiye Qara deñiz flotunıñ ştabına raketa darbesi endirildi, dep haber etti.
Rusiye Mudafaa nazirligi darbeden soñ bir arbiy ğayıp oldı, ava mudafaa quvetleri beş raketa urıp tüşürgen, dep bildirdi. Aynı vaqıtta içtimaiy ağlarda darbe neticesinde altı kişi yaralandı, dep yazalar. Bu malümatnı tasdıqlaycaq resmiy bir delil yoq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
