RF Qara deñiz flotu Rusiyeniñ Qara deñiz zahire añlaşmasından çıqqan soñ Ukrayina blokadasına azırlanaraq mevzisini deñiştirgen. Bunı Büyük Britaniya Mudafaa nazirligi haber ete.
Büyük Britaniya istihbaratınıñ malümatına köre, "Sergey Kotov" körveti Qara deñizniñ cenübiy qısmında İstanbul boğazı ve Odesa arasındaki gemi yolunda devriye eterek aylanğan.
"Onıñ Rusiyeniñ Ukrayinağa ketkenine inanğan ticariy gemilerini toqtatmaq içün iş gruppasınıñ bir qısmı olma ihtimalı pek yüksektir", - dep yazıla bildirmede.
Rusiyeniñ zahire añlaşmasından çıqmasından soñ Qara deñizde silâlı qarşıturma şiddeti ve büyükligi arta bile, dep qay eteler istihbaratta.
Zahire añlaşması iyülniñ 17-nde toqtatıla, dep bildirdi Kreml matbuat kâtibi Dmitriy Peskov. Onıñ aytqanına köre, añlaşma çerçivesinde Rusiye talap etken şartlar yerine ketirilmegen.
2023 senesi iyülniñ 17-nde Rusiye, Ukrayina, Türkiye ve BM arasında Ukrayina zahiresiniñ Qara deñiz limanlarından çıqaruv añlaşması olğan «zahir añlaşmasınıñ» (Qara deñiz zahire teşebbüsi) müddeti bite. Onı aman-aman bir yıl evelsi, 2022 senesi iyülniñ 22-nde, o vaqıt endi bir qaç ay devam etken Rusiyeniñ Ukrayinağa qarşı büyük silâlı istilâsı bütün dünyada aşlıq fiyatlarını arttırğan soñ imzalağan ediler.
Büyük istilâ başlağanınen Rusiye Ukrayinanıñ zahire satışlarını blok etip başladı. Rusiye gemileri Qara deñizde turıp, diger dünya limanlarına zahire taşığan çeşit memleketlerniñ gemilerine yol bermey edi. Şimdi Rusiye bu añlaşmanı uzatmağa istemey. Zahire añlaşması sayesinde dünyadaki aşlıq fiyatları stabilleşken ve em Ukrayina zahiresi, em Rusiye aşayt mahsulatlarınıñ ihrac etilüvine imkân berilgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
