Ukrayina arbiyleriniñ malümatına köre, keçken ay "Sergey Kotov" patrul gemisi battı, em de "Konstantin Olşanskiy" , "Yamal", "Azov" büyük desant gemileri ve "İvan Hurs" istihbarat gemisi zarar kördi.
"Rusiye Federatsiyasınıñ Qara deñiz flotu içün yaramay ay", – dep yazalar Ukrayina cenübiy mudafaa quvetleriniñ telegram kanalında.
Martnıñ 5-nde ukrayin istihbaratı Keriç civarında "Sergey Kotov" Rusiye gemisiniñ yoq etilgeni aqqında bildirdi.
Martnıñ 24-nde Ukrayina Silâlı quvetleri, mudafaa quvetleri RF Qara deñiz flotunıñ büyük "Yamal" ve "Azov" desant gemilerini, bağ merkezini ve bir qaç infrastruktura obyektini urdı, dep bildirdi.
Daa soñra Ukrayina Silâlı quvetleriniñ Arbiy-deñiz quvetleri martnıñ 23-nde işğal etilgen Aqyarda daa bir Rusiye gemisi "İvan Hurs"nıñ zarar körgenini bildirdi.
Mart ayında Ukrayina Mudafaa quvetleri, 10 yıl evelsi Qırım ilhaqı vaqtında Rusiye arbiyleri tarafından zapt etilgen "Konstantin Olşanskiy" adlı ukrayin gemisine raketalarnen ücüm etti.
Rusiye tarafı bu ğayıplar aqqında haber etmey ve adet üzre Ukrayina ücümleri sebebinden Rusiye Federatsiyasınıñ Qara deñiz flotunıñ ğayıplarını izaatlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
