Herson vilâyetiniñ arbiy memuriyetiniñ yolbaşçısı Aleksandr Prokudin salı künü kündüz RF ordusı Hersonğa kene darbe endirgenini bildirdi.
"Herson ateş astında. "Grad" ola bile. 20-ge yaqın patlav", - dep yazdı o.
"Cenüp" operativ komandanlığı RF ordusı Hersonnıñ mesken mallelerine, kritik infraterkip obyektlerine, bala bağçasına, hastahanege darbe endirgenini bildire.
"Bir qaç ev ciddiy zarar kördi. Çoq qatlı binalarda bir qaç daire yana. Yerli bazar ve cemaat naqliyatı durağı ateşke tutuldı. Soqaq ortasında, öz evleri ve çalışqan yerlerinde Herson sakinleri yaralandı ve öldi. Eñ az 6 kişi öldi ve 12 yaralandı, malümat alına", - dep yazıla bildirmede.
Rusiye ordusı noyabr ayında Hersondan ketken soñ şeerge ve Ukrayina akimiyeti kontrol etken vilâyet rayonlarına muntazam sürette ateş açıla.
Herson vilâyetiniñ şura deputatı Serğiy Hlan Azatlıq Radiosına bildirgenine köre, Hersonda işğal bitken soñ 80 biñ kişi yaşay edi – şimdi aman-aman 10 biñ insan şeerden ketti.
Fevralniñ 21-nde Rusiye prezidenti vladimir Putin RF Federal toplaşuvına muracaat etti. O, Rusiyeniñ Ukrayina ğaqarşı kerçekleştirgen cenkte Ğarpnı qabaatladı ve arbiy areketlerni devam ettirmege söz berdi.
Rusiye 2022 senesi fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
