Ukrayina fevqulâde vaziyetler devlet hızmetiniñ malümatına köre, RF-nıñ oktâbrniñ 10-nda Ukrayina şeerlerine büyük raketa darbeleri neticesinde elâk olğanlarnıñ sayısı 19, yaralanğanlarnıñ ise 105 olğan.
Keçenlerde aqşam 14 ölgen ve 97 yaralanğan kişi aqqında haber etilgen edi.
Fevqulâde vaziyetler hızmetiniñ bildirgeni kibi, Ukrayinanıñ 300 meskün yerinde elektrik energiyası alâ daa yoq. 3500 biñden ziyade meskün yerde ise elektrik artıq ğayrıdan qurulğan.
Oktâbrniñ 10-nda saba Rusiye ordusı Ukrayinağa bir çoq yerden ateş açtı. Ukrayina Silâlı quvetleri 43 raketa tüşürildi ve Rusiye Ukrayinağa qarşı 83 raketanı qullandı, dep bildirdi. Ukrayina arbiyleri 12 Shahed-136 İran uçucısızını tüşürdi.
Ukrayina prezidenti Volodımır Zelenskıynıñ aytqanına köre, Rusiye ordusınıñ eki nişanı bar – memleketniñ energetik obyektleri ve insanlar. Ukrayına baş naziri Denis Şmığal bildirgenine köre, Rusiyeniñ ücümleri neticesinde 8 regionda ve Kıyivde 11 «müim infrastruktura obyekti» zarar kördi.
Rusiye prezidenti Vladimir Putin Ukrayinağa, hususan energetika obyektlerine ücüm etilgenini tasdıqladı. O, «Rusiye topraqlarında terakt ıntıluvları» devam etse, yañı ücümlernen qorquza.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
