RF Mudafaa nazirligi Ukrayinanı Prıdnistrovyağa ücüm azırlamaqnen qabaatladı. Bunıñ aqqında nazirlikniñ beyanatında yazıla.
Nazirlik Ukrayina akimiyeti Ukrayina Silâlı quvetleriniñ, şu cümleden "Azov" bölüginiñ iştiragi ile provokatsiya azırlağanını bildire
"İstilâ içün sebep olaraq, Rusiye orudsınıñ Prıdnistrovye toprağından iddia etilgen ücüminiñ teşkil etilmesi planlaştırıla", - dep yazıla bildirmede.
Haber etilgeni kibi, bunıñ içün ukrayin diversantları Rusiye arbiyleri urbasına kiyinecek eken.
Moldovada rusiyelilerniñ malümatını red eteler. "Devlet organları bu saba Rusiye Mudafaaa nazirligi darqatqan malümatnı tasdıqlamay. Er kesni sakin olmağa ve Moldova Cumhuriyetiniñ resmiy ve işançlı menbalarından malümat almağa çağıramız", - dep qayd ettiler olar.
Daa evel Moldova devlet başı Mayya Sandu defalarca Rusiyeni memleketteki vaziyetni turğunsızlaştırmaq ıntılğanında qabaatlap, RF-nı ordusınıñ çıqarılmasına çağırğan edi.
Rusiye 2022 senesi fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
