RF gece devamında Keriç köprüne ücüm ıntıluvı aqqında eki kere bildirdi. Rusiye Mudafaa nazirligi köpürge üç ukrayin deñiz dronı ücüm etmege tırışqanını iddia ete.
Nazirlikte, saat ekilerde yarı suvğa dala bilgen insansız qayıqnen köpürge darbe endirmege tırışılğanını bildirdiler. Biraz soñra üçünci dron aqqında malümat keldi.
Köpürde avtomobil naqliyatınıñ areketi yarı geceden üç saatqa qapaldı.
Ukrayina "Cenüp" operativ komandanlığınıñ spikeri Natalâ Ğumenük, böyle etip Rusiye "vaziyetni kerginleştirmege tırışa", dep saya.
"Er sefer bu yapınıñ etrafındaki vaziyetni kerginleştirmege tırışqanları sadece olarnıñ taktikasıdır. Bu naqliyat infraterkibi obyektiniñ qullanmasınıñ neden mümkün olmağanını bir şekilde aqlı çıqarmaları kerek", - dep añlattı o.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
