Rusiye mahkemesi tarafından 15 yılğa azatlıqtan marum etilgen Qırımlı Sergey Lihomanovnı kene Aqmescitke etap ettiler. 40 kün devamında onıñ bulunğan yeri belli degil edi. Al-azırda aq qoruyıcılar onıñ Aqmescitteki 2-nci SİZOda bulunğanını ögrendi, dep bildirdi aq qoruyıcı ve Qırımtatar resurs merkeziniñ idarecisi Zarema Bariyeva.
Bundan evel, kiçik aynıñ 16-nda qorantası ondan tibbiy ilâclarğa muhtac olğanını bildirgen mektüp aldı. Yazışuv sıñırlavları sebebinden o, öz vaziyetini açıq-aydın añlatıp olamadı. Bariyevanıñ malümatına köre, Rusiye apishanesi şaraitlerinde Lihomanov bayağı azdı ve kerekli tibbiy yardım almay.
"Belli olğanı kibi, Sergeyni saban ayınıñ başında Taganrognıñ 2-nci SİZO-sından Aqmescitniñ 2-ncñ SİZO-sına avuştırğanlar. Sağlığı ağır olğanına ve hronik hastalıqlarğa baqmadan, Sergeyni ekinci kere etap ettiler, amma bu sefer Qırımdan degil, aksine işğal etilgen Qırımğa. Sergey Lihomanovnıñ ikâyelerine iç de pahıllamaq mümkün degil. Bu işkencege dayanmaq içün içimizde nasıl bir insanüstü küç olmalı, bilmeyim, ve bu fizikiy işkencege degil, ilk evelâ maneviy işkencege ait. Sergey Qırımnıñ siyasiy mabüslerinden biri, eki kere mahküm etilgen ve eki kere Qırımdan ve Qırımğa etap etildi", dep yazdı Bariyeva Facebook saifesinde.
Bundan evel haber etilgenine köre, Qırımlığa içek tedaviylenmesi içün ilâclar kerek, bu ise, aşqazan-içek traktnıñ hronik hastalıqlarınıñ kerginleşkenini köstere bile, prostata tedaviylenmesi içün ilâclar kerek. Daa evel oña proktosigmoidit ve sigmomiy içekniñ divertikuliti diagnozı qoyulğan edi.
"Meja" portalınıñ bildirgenine köre, 2023 senesiniñ soñunda Ukrayinli Sergey Lihomanovnı Aqyarda yaqaladılar. 2024 senesiquralayda Rusiye mahkemesi onı patlayıcı taşığanında ve saqlağanında qabaatlı tanıp, beş yılğa azatlıqtan marum etti.
Keçken sene orta küz ayında Rusiye Cenübiy okrugınıñ arbiy mahkemesi Qırımlı Sergey Lihomanovnı devlet hainliginde qabaatlap, 15 yılğa azatlıqtan marum etti.